أحايد إن ضاقت و طبعي تفاؤل
الشعر من ناري أمل..دقة أجراس
وللفرح أدعِي اللي بهمّه تهاول
عيش الفرح لوكذب وبالصدق ينباس
وإذا قصَر حظّـك تفاؤل تطاول
ظلم الزمن بالعزم ياكثر ماانداس
ف لاتقول لي بالحزن لا لا تفاول
كم لك تجي وتشوف الاحزان لي لباس
ما أوعدك يا عيد لكن بحاول
أفرح إلى من جيت مع باقي الناس
في كل صحنٍ بجلس وبتناول
متكشخ مثبت عقالي على الراس
وبخير ردي يكون لاية تساؤل
و أوزع البسمات لو كنت منحاس
ولا مر طيف الزين بقول فاول
أضحك على أحزاني وأخفيه هوجاس
فرح و حزن بقضيي نهارك تداول
إلين شمســــك تختفي خلف الاطعاس
أمّا اذا جا الليل جاني بمعاول
تحفر في أوجاعي وتهدي لــ قرطاس
هذي هي الخطّه في صبحك بحاول
وإذا غلبني الهم فـ اسمح ولا باس
وتأكد بأن العشق مابه تضاؤل
لو عاش فرقا يعيش صلب وقوي باس
وياليت توعدني للأجمل تناول
رساله من عاشق أحاسيسه ألماس
وقل:ترى كل عام ذكرى يزاول
حــــبك..لأن الحلم موّته أعراس
وكل عام وأنتي الخير..فرحك جداول
يسقي القراح ويثمر الفرح فإحساس
وكل عام و وجودك سبب للتفاؤل
لو كان ذكرى مامتلا بحاضر الكاس
دنيا تخلّيك أنتي افـ مُتناول
إنسان..فيها الجود أساسي ونبراس
بتعطي فرح والشرط ما ارسم جداول
تقارْنك باية شي/أحد بأي مقياس
بسيطه مافيها شكوك وتساؤل
ياأجمل من الأشعار ومن رسم كراس
وقل : ترى ( أنتي عيده) عجزت أحاول
و دايم يناديني بيا ( عيد هالنـــاس )